ഒരാളെ കാണുമ്പോള്‍ ആദ്യം
കാലുകളില്‍ നോക്കുമെന്നു നീ പറഞ്ഞു.
തേഞ്ഞു തുടങ്ങിയ വള്ളി ചെരിപ്പാണെങ്കില്
നിനക്കു കൊച്ചി ഭാഷയിലൊരു " യ്യേ"
വള്ളിചെരിപ്പില്‍ കാലുകള്‍ സുവ്യക്തം.
പോളിഷ് ചെയ്തു മിനുക്കിയ
കറുത്ത ഷൂസിനുള്ളില്, വെളുത്ത സോക്സിനു കീഴെ
അവന്‍ ഒളിപ്പിച്ചു വെയ്ക്കുന്നത്
കുഴിനഖം ആവാം , പുഴുക്കടി ആവാം,
വെടിച്ചു കീറിയ ഉപ്പൂറ്റിയുമാവാം.
ബൂട്ടിനുള്ളില്‍ തോക്കാവാം , കഠാരയാവാം.
നിനക്കു "യ്യോ" തോന്നുന്ന മറ്റെന്തുമാവാം
മനുഷ്യന്‍ അവന്റെ ഹൃദയത്തെ
കാലുകളിലല്ല സൂക്ഷിക്കുന്നത് .
