അലക്കിവിരിച്ചത്

തലയ്ക്കുമീതെ

2012-02-13T02:21:00.000-08:00

ഒരു ദിവസം നോക്കിയപ്പോഴുണ്ട്
മഞ്ഞച്ചിരിക്കുന്ന ആകാശം
മഞ്ഞക്കടല്‍
മഞ്ഞ മണല്‍
കാണുന്നതെല്ലാം പീതം.
പീതാംബരം.

പാഠത്തില്‍ നാനാര്ത്ഥം.
യൂട്യൂബില്‍ കോള്‍ഡ്‌ പ്ലേ.
(അന്തരീക്ഷത്തില്‍ ചെന്താമര
വെണ്ടുരുത്തിയില്‍ കുന്തിരിക്കം
എന്ന താളത്തില്‍))))) വായിക്കുക)

ഫ്ലൂറസന്റ് ലൈറ്റ്‌ കത്തിച്ചുട്
ക്യുബിക്കിള്‍ പോലെ
കണ്ണിലെല്ലാം ഒരെക്കിള്‍
വെള്ളംകുടിപ്പിക്കുന്നു.

ഒന്നിച്ച്
രണ്ടുപാട്ടും പാടിത്തുടങ്ങി
“തലയ്ക്കുമീതെ ശൂന്യാകാശം താഴേ മരുഭൂമി”
“തലയ്ക്കുമീതെ താരഗണങ്ങള്‍ എണ്ണിത്തീര്ക്കാനമോ”
“ദാഹജലം തരുമോ?”
നീയും ഞാനും അതിലും വിശേഷമോ?”
“ചിന്തിച്ചുനോക്കൂ”
വേഴാമ്പല്‍ ഞാന്‍”

You just unplugged a device from the audio jack

കണ്ണടച്ചിരുട്ടാക്കാമിനി മഞ്ഞക്കിളീ,
ബൂം!

ഹോര്ലിക്സ് കുപ്പി

2012-02-13T01:26:00.001-08:00

നോക്ക്
ഇളകുന്ന കണ്ടോ
കണ്ണടയ്ക്കില്ലേ
വാ തുറക്കുന്നു
വെശന്നുകാണും
ചോറ് തിന്നുമോ
വെളുത്ത് പോയോ
മലര്ന്നു പോയോ
അയ്യോ!

നെഹ്‌റു മെമ്മോറിയല്‍

2012-02-11T09:48:00.000-08:00

വൈകിയാണെത്തിയത്,
നഗരത്തെ പറ്റിയാണ് സെമിനാര്‍.
ഇറങ്ങിയപ്പോള്‍ ആകെയുള്ള ചിന്ത
ഉച്ചക്ക് ഇനി ചോറ് വയ്ക്കണ്ടല്ലോ.
എന്തായാലും പതിനൊന്നരയ്ക്ക് എത്തി.
ആദ്യത്തെ ചായഇടവേള കഴിഞ്ഞിരുന്നു,
കയറിയപ്പോള്‍ മുഖത്ത്
ചിന്തിച്ചുവശംകെട്ട കാലുഷ്യം വരച്ചു.

ഒരു സീറ്റ് പോലുമില്ലല്ലോ,
ആഹ, ദാ അങ്ങ് ദൂരെ കോണിലായി ഒരു സീറ്റ്.
ഭാഗ്യം!
കണ്ണടയില്ലായിരുന്നെങ്കില്‍ ഗൌരവം തൂക്കിവാങ്ങേണ്ടിവന്നേനെ.
നോട്ടുബുക്കെടുത്ത്‌
ഇടയ്ക്കിടെ സംസാരിക്കുന്ന മുഖത്ത് നോക്കി
ചേരുംപടി തലകുലുക്കിചേര്‍ത്ത്
ചിത്രം വരച്ചു.

എന്താ ഒരു നാറ്റം?
ഹോ, നാറ്റം തന്നെ.
മൂത്രമോ?
അടുത്തിരിക്കുന്ന കണ്ണാടിക്കാരന്‍ ഉറക്കമാണ്.
കക്ഷം പൊക്കി ചൊറിയുന്നു,
നാറുന്നു.
ഒന്ന് പാളിനോക്കിയപ്പോള്‍ ഉറക്കത്തില്‍ ചൊറിയുന്നയാളെ കണ്ടു.
തെറ്റില്ലാത്ത കുപ്പായം.
പനിപിടിച്ചപോലെ കുറുകുന്നു.

ലെക്ചര്‍ ശ്രദ്ധിച്ചുനോക്കാം,
"Indian American Diaspora Identities..."

ഛെ, ചര്‍ദ്ദിക്കാന്‍ വരുന്നു,
അപ്പുറത്ത് ഒരു കിളവന്‍,
അയാളുടെ മേല്‍ ചായുന്നുണ്ട് ഇയാള്‍,
കിളവന്‍. വിളറിയിരിക്കുന്നു
സീറ്റ് ഒഴിഞ്ഞു കിടന്നത് വെറുതെയല്ല.
സമയം പന്ദ്രണ്ട്,
അത്രേ ആയുള്ളൂ?
ഒന്നരയ്ക്കാണ് ഊണ്.

കെട്ടിയെടുക്കണ്ടായിരുന്നു,
ചോറ് വെച്ചാമതിയായിരുന്നു.

മുടിയൊക്കെ ചീകി വെച്ചിട്ടുണ്ട്,
കണ്ണടയുണ്ട്, അതിനൊരുകാലില്ല.
ഉറക്കത്തില്‍ കണ്ണടയുടെ പാതി ഒരു കണ്ണിലും മറ്റേപാതി ഒരു കവിളിലുമായിട്ടുണ്ട്,
ഷൂസുണ്ട്,
ഒന്ന് കുളിച്ചിട്ടുവന്നൂടെ?

As a discussant, I am extremely overwhelmed to move this session to the second speaker, XXYY with her paper "Engendering the City"

നാറ്റം.
മൂത്രത്തിന്റെ,
വിയര്‍പ്പിന്റെ,
ചെളിയുടെ,
ശരീരത്തിന്റെ.

തല ചുറ്റുന്നുണ്ടോ?
ആരുംകാണാതെ മൂക്ക് പൊത്താന്‍ ശ്രമിച്ചു,
കൈയ്യിലെ വിന്റര്‍ക്രീമിന്റെ മണം.
ലോലമൃദുലചര്‍മ്മകാന്തിമണം!
ആഞ്ഞാഞ്ഞുശ്വസിച്ച് ശ്വാസം തട്ടി കണ്ണടയില്‍ മഞ്ഞുമൂടി.
ബോധം മറയുന്നതാണോ?
കണ്ണടയില്‍ മൂടല്‍ മാറി.
നാറ്റം.
പന്ദ്രണ്ടര.
ഒരു മണിക്കൂര്‍ കൂടി.
ഇവര്ക്കൊന്നു നിറുത്തരുതോ?

എന്താ ഈ പറയുന്നത്?

the proposal was to remove undesirable elements from the vicinity of the city....

മുന്നില്‍ മൈക്ക് ഉണ്ട്.
എണീറ്റ്‌ നില്ക്കാന്‍ തോന്നി.
"He is bloody undesirable,please remove him!!"
വിളിച്ചു കൂവാന്‍ തോന്നി.
ഒന്ന് പത്ത്
ഏതുനിമിഷവും ചര്‍ദ്ദിക്കാം
ഇറങ്ങിയോടി.

Ladies

മുഖം കഴുകി
വീണ്ടും മുഖം കഴുകി
അറപ്പ് കഴുകി
അവജ്ഞ കഴുകി
ദേഷ്യം കഴുകി
തുടച്ചു.

എല്ലാവരും കഴിച്ചുകഴിയാറായെന്നു തോന്നുന്നു
കടായ് പനീര്‍, മട്ടര്‍ മഷ്രൂം, ലച്ച പറോട്ട, പുലാവ്,ബൂന്ദി റായ്ത,ഗാജര്‍ കാ ഹല്‍വ
വിശപ്പേ!
രണ്ടുഗ്ലാസ് വെള്ളവും.

ഹോ, തുടങ്ങി.
ഇവിടെയൊരു സീറ്റുണ്ട്,
അയാളെവിടെ?
ഉച്ചകഴിഞ്ഞു കയറിയില്ലേ പോലും?
ആ പോട്ടെ!

Post Lunch Session
Partition Memories and the City.

അനധികൃതം

2012-02-05T23:27:00.000-08:00

വേദനയില്ലാത്ത ചില ശസ്ത്രക്രിയകളുണ്ട്
മുഖത്തുനിന്നും ചിരി എടുത്തുകളയുക,
ഉറക്കത്തില്‍നിന്നും സ്വപ്‌നങ്ങള്‍ എടുത്തുകളയുക
എന്നിങ്ങനെ

ആശുപത്രിയുടെ പിന്നാമ്പുറമൊന്നുകാണണം
കുമിഞ്ഞുകൂടിക്കിടക്കുന്നു
ലക്ഷക്കണക്കിന് ചിരികള്‍
കോടാനുകോടി സ്വപ്‌നങ്ങള്‍
സ്വപ്നത്തിലെ ചിരികള്‍
ചിരികളിലെ സ്വപ്‌നങ്ങള്‍

നീക്കം ചെയ്തയുടന്‍ കരിച്ചുകളയേണ്ടവയാണ്
സര്‍ക്കാരിന്റെ ഭാഗത്തുനിന്നുള്ള വലിയ അനാസ്ഥ തന്നെ.

ആയിരം കടം

2011-12-05T03:46:00.000-08:00

താഴേയ്ക്ക് ഉരുണ്ടുരുണ്ട് വീഴാത്ത മുത്തുമണികള്‍ ഉള്ളിലിങ്ങനെ നിറഞ്ഞുകുലുങ്ങി ഇമ്പമുള്ള ശബ്ദം കേള്‍പ്പിക്കുന്നത് കണ്ണില്‍ ചുണ്ടുചേര്‍ത്ത് കേള്‍ക്കുന്നതാരാ?

തലയണ

ത്ഫൂ

2011-02-21T03:27:00.000-08:00

ആകാശത്തെയ്ക്ക് കണ്ണുംനട്ട്
മലര്‍ക്കെ
കിടക്കുകയാണ് ഒരു പുസ്തകം,
മഷി പുരള്ന്നതിന്റെയോ താള്‍ കീറുന്നതിന്റെയോ
ശബ്ദങ്ങള്‍ക്ക് കാതോര്ത്തും,
ചിതലരിക്കാതെയും
കപ്പലായി രൂപാന്തരപ്പെടാതെയും
മലര്‍ന്നുകിടന്നു
വാക്ക് തുപ്പിയും വിഴുങ്ങിയും.

സ്മോക്ക്

2011-01-08T22:29:00.000-08:00

രൂക്ഷമായി കത്തുന്ന ഒരു മൂലയില്‍ ഞാന്‍ മൂളിപ്പറക്കുകയാണ്. ചോരയിലേക്കിറങ്ങുമ്പോള്‍ എനിക്ക് നന്നായറിയാം ഒരു മൂളലില്‍ ഞാന്‍ വീഴുമെന്ന്. എന്നിട്ടുമെത്രയോ മദിപ്പിക്കുന്നു ചാവുമുറിയിലെ അത്താഴവും ഏകാന്തതയും.

അടിയൊഴുക്കുകളില്‍ നിന്ന് ചുഴിയിലേയ്ക്കുള്ള പോക്ക് a.k.a ജീവിതയാത്ര

2010-11-04T00:31:00.001-07:00

നീ ഒരു പേര് പറയുമെന്നോര്ത്താ
ഞാന്‍ പറയാഞ്ഞത്.
നിന്‍റെ ശബ്ദത്തില്‍ നിന്നും എന്‍റെ പേര്
മുങ്ങിമുങ്ങിപ്പോയ്‌, ഹോയ്‌!

മുന്‍ധാരണകളില്ലായിരുന്നെങ്കില്‍ മഴക്കാലങ്ങളില്‍ വെയില്‍വെട്ടങ്ങളില്‍ പുലര്‍സ്വപ്നങ്ങളില്‍

2010-10-11T02:46:00.000-07:00

മഴത്തുമ്പിലിരിക്കുകയാണ് ഒരില,
ആരാരെ പൊഴിക്കുമെന്ന് നോക്കി
നനയുമെന്നോര്ത്ത്
കുളിരുമെന്നോര്ത്ത്
വേനല്‍ വന്നെന്നെ
കൊത്തല്ലേ കൊത്തല്ലേയെന്ന്
കരഞ്ഞുവിളിച്ച്
ഇലത്തുമ്പിലിരിക്കുകയാണ് ഒരു മഴ.

ത!

2010-09-17T00:55:00.001-07:00

കണ്ണില്‍ നോക്കിയപ്പോള്‍ ഒരു മഴയിറങ്ങി വരുന്നത് കണ്ടു.
പിന്നെ മഴ ഒരു കുടചൂടുന്നതും
മഴ മഴനനയുന്നതും
മഴ വിസിലൂതുന്നതും
മഴ ഒരു തെറിയാകുന്നതും
മഴ ബസ്‌ തടയുന്നതും
മഴ കഞ്ചാവുബീഡി വലിക്കുന്നതും
മഴ ബാബുരാജിനെപ്പോലെ പാടുന്നതും
മഴ കരള്കീറുന്നയൊച്ചയില്‍ നിലവിളിക്കുന്നതും
മഴ കുട്ടികളെ കോക്രികാട്ടുന്നതും
മഴ കരയുന്നതും...

ഒടുവില്‍ നാട്ടില്നിന്ന് കേട്ടു,
ഇന്നലെ മഴ മരിച്ചു.
ആരും അറിഞ്ഞില്ലത്രേ.

(*ആദ്യമായി ഒരാള്‍ ദൈവത്തെ തെറിപറയുന്നത് കേട്ടത് ഇവിടെനിന്നാണ്. നാട്ടിലെ ഒരേയൊരു അവധൂതന്‍. എന്റെഅ ചെറിയ നാടിന്റെ എതിര്‍ ആത്മന്‍ . ഭഗവാന്‍ ഭക്തരാജ് എന്ന് സ്വയം വിളിക്കും. ഇന്നലെ മരിച്ചു. എണ്പതുകളില്‍ പ്രായം.)

ഇറ്റ്‌സ് കോംപ്ലിക്കേറ്റഡ്

2010-09-12T23:51:00.000-07:00

നിന്നില്‍ തിളച്ചാവിയായി
പെയ്ത് ഞാന്‍ കെടുത്തും.

മണ്ണിന്‍റെ ഞരമ്പിലിറങ്ങി
നമ്മള്‍ പൂക്കും.

ദൂരം, ആകാശം, ഒരു കിളി, പിന്നെ പ്രളയം

2010-08-02T09:41:00.000-07:00

അറിയുന്നു പ്രേമം
മൂര്‍ച്ചയേറിയ
ഒരായുധം പോലെ
അരം തിളക്കി
ചിരിച്ചുകൊണ്ടും
തണുപ്പ്തീര്‍ന്ന
നിലാവേപ്പോലെ
അകലെ നോക്കി
നിന്നുകൊണ്ടും
ത്രസിപ്പിക്കുന്നത്
മനസിനെ,
രക്തം ഇരച്ചുകയറ്റുന്ന
ഞരമ്പിന്റെ അറ്റങ്ങളെ.

ഒരുമ്മയില്‍ എല്ലാ സത്യവും അടങ്ങുന്നു,
പക പോലെയാണ് തീരാത്ത പ്രേമം.

ഐറിസ്‌

2010-06-28T05:56:00.001-07:00

പ്രേമം കൊണ്ടാണ്

പഹാഡ്ഗന്ജിലെ

പാവക്കുട്ടിയുടെ കണ്ണ്

നീലയാകുന്നത്....

കണ്ടില്ല,

അറിയാം.

തരംഗദൈര്‍ഘ്യം

2010-04-15T10:38:00.000-07:00

ബ്ലേഡ് പോലെ നിന്റെ ഓര്‍മ്മകള്‍
മനസ്സില്‍ വരയുമ്പോള്‍
മുറിയുന്നു.

നീ ചലിക്കുന്നു, ഞാനും.
നീ മിണ്ടുന്നു, ഞാനും.

ഒടുവില്‍ നിന്റെ ഉമ്മകള്‍ എന്റെ ഉമ്മകളെ
ഏതോ ഒപ്ടിക്കല്‍ഫൈബര്‍ കേബിളിനുള്ളില്‍
പരസ്പരം ചേര്‍ത്ത് പിടിക്കുമ്പോള്‍
ഞാന്‍ കണ്ട ഏറ്റവും നീണ്ട രാത്രി കഴിഞ്ഞു പോകുന്നു.

ഞാന്‍ ഉറങ്ങുന്നു, നീയും.

ഉണങ്ങിയ ചില്ലകള്‍ തീയില്‍ ഇടുക; ശ്വാസത്തില്‍ മഞ്ഞുകാലം മണക്കുന്നു.

2009-10-28T10:38:00.000-07:00

ഓ, തിളച്ചു മറിയുന്നതിനെത്രമേല്‍ പ്രേമം,
കുശുമ്പ്,
നിന്നെ മൂടുന്ന പുതപ്പിനെ
ഞെരിച്ചു ഞെരിച്ചു കൈ കുഴഞ്ഞപ്പോള്‍
വീണ്ടും ഇതെത്ര മേല്‍ എത്ര മേല്‍ അന്പ്.

ഞാന്‍ പൂത്തു മറിഞ്ഞതും
കൊഴിഞ്ഞാര്‍ത്തു ചിരിച്ചതും
വീണു കരിഞ്ഞതും
വസന്ത കാലത്തിന്റെ താളം,
തട്ടിപ്പ്.

ഇത് മരങ്ങള്‍ ബോണ്‍ ഫയറിനു ചുറ്റും ചേര്‍ന്നിരുന്ന്
പുകവലിക്കും കാലം.

ആ മരം ഈ മരം

2009-09-02T11:07:00.000-07:00

നിന്റെ മയക്ക മറുലോകങ്ങളറിയാതെ,
പടര്‍ന്നു കയറുന്ന വിഷങ്ങള്‍
നിന്റെ രക്തത്തോട്
പറയുന്ന രഹസ്യങ്ങള്‍ അറിയാതെ,
തണുത്തൊരീ വെളുപ്പിന്റെ
തീക്ഷ്ണ മണങ്ങളില്
വേരിറക്കി,
കട പുഴകാതെയും
കടലെടുക്കാതെയും
നിവര്‍ന്നു നില്‍ക്കുന്നു ഞാന്‍;

ചില്ലകള്‍ തോറും നുണ പറഞ്ഞു നടക്കുന്ന കാറ്റിനെ
ചെവിക്കു നുള്ളി വഴക്ക് പറഞ്ഞ്
ഇറക്കി വിട്ടു കൊണ്ടും,
ഇലകളെ ഉമ്മകളാക്കി
അടര്‍ത്തി ഉണക്കി
സൂക്ഷിച്ചു കൊണ്ടും..

ഒരു തൂവല്‍ കൂടി കരിയുന്നു; ഒരു രാവിരുട്ടി വെളുക്കുന്നു.

2009-09-02T10:54:00.000-07:00

ഓരോ രാ മണി മുഴക്കത്തിലും
തുളഞ്ഞിറങ്ങുന്ന
തുരുമ്പിച്ച കത്തി പോലെ
വേദനക്കോടി വര്‍ഷങ്ങള്‍.

'പറന്നു പറന്നു പറന്നു ചെല്ലാന്‍ പറ്റാത്ത'*
നിലയറിയാ താഴ്ചകള്‍ ഏതെല്ലാം?

സഹന പരിധികള്ക്കപ്പുറം
മൊഴി മാറ്റി
നീ നാടുകടത്തിയ
പീഡകള് ഏതെല്ലാം?

നിന്റെ ശ്വാസം ഇനി എതുവാ-
ക്കേതു വാക്കോതുമെന്നോര്ത്ത്
അര്‍ത്ഥ ബോധത്തിന്റെ
ഘന തമസ്സില്‍ ഉടക്കിയെന്റെ
ചിറകു കരിഞ്ഞു ദുര്‍ഗന്ധം പരക്കുന്നു.

*ഒരു പാട്ട്, ഒരു വരി, ഒരു ജീവിതം.

തനിച്ച്

2009-07-03T00:31:00.000-07:00

മുങ്ങി മരിക്കണമെന്നാശിച്ച
നീല ജലാശയം
എന്നെ പ്രതിഫലിപ്പിച്ചു.
പടിയിറങ്ങുന്ന നേരം ലാഭിച്ച്
ഞാന്‍ വഴുതിവീണു.
കണ്ണില്‍ അപ്പോള്‍ ജലാശയമായിരുന്നു.
ആഴങ്ങളിലേയ്ക്ക് ഇറങ്ങിയപ്പോള്‍
എവിടെ വെച്ചാണ്
ഞാന്‍ ഉഭയജീവി ആയത്‌?
ഞെട്ടാതുണര്ന്നപ്പോള്‍
മെല്ലെ കണ്‍ തുറന്നപ്പോള്‍
ഞാന്‍ തനിച്ചായിരുന്നു.
മീനുകള്‍ ചുംബിച്ച പോല്‍
കാല്‍ വിരലുകളില്‍ മൃദു സ്പര്‍ശമായത്
മിന്നാമിനുങ്ങുകള്‍ ആയിരുന്നു.

പനി

2009-07-03T00:12:00.000-07:00

വാക്കുകളുടെ എണ്ണത്താല്‍
ആഴം അളക്കാവുന്നതല്ല അര്‍ഥം.
ചില ശബ്ദങ്ങള്‍...
തീരെ ചെറിയ ചില ശബ്ദങ്ങള്‍,
ഒരു കൊച്ചു ചുമ,
അല്ലെങ്ങിലൊരു നിശ്വാസം.
മതി.
ദീര്‍ഘ വാചകങ്ങള്‍ക്ക് ഇല്ലാത്തതാണ്
ചുമയുടെ സംവേദനത്വം.
ചുമയുടെ ഭാഷ.
ശബ്ദം ഉയര്‍ത്താതെ,
അലോസരപ്പെടുതാതുള്ള
ചെറു ചുമകളുടെ കരുതല്‍.

ആദിയില്‍ ആദ്യം ഉണ്ടായത്
ദൈവവചനം അല്ല.
സമുദ്ര സൃഷ്ടിക്കായി
നിര്‍ത്താതെ പെയ്ത മഴ
മുഴുവന്‍ നനഞ്ഞ
വികൃതി കുട്ടി ദൈവത്തിന്റെ
പനി പിടിച്ച കൊച്ചു ചുമ!

ദാനിയേല്‍ 13

2009-04-27T21:57:00.000-07:00

എന്റെ മുറിയില്‍ ഇപ്പോള്‍ ഉറങ്ങുന്നുണ്ട് സൂസന്ന.
ഉടുപ്പോരല്‍പ്പം ഉയര്‍ന്ന്,
എറുമ്പ് രോമങ്ങള്‍ സന്കീര്‍ത്തനം വായിക്കുന്ന
ചെറിയ മെലിഞ്ഞ കാലുകള്‍.
അവളുടെ ചുരുണ്ടു ചുരുണ്ട മുടി.
നെറ്റിയില്‍ ടൈഗര്‍ ബാം പൊള്ളിയ ചതുരങ്ങള്‍.
മുഖത്തോട് ചേര്‍ന്ന വിരല്‍
എപ്പോള്‍ വായില്‍ വെയ്ക്കുമോ എന്തോ?
ഉറങ്ങുന്നതു കണ്ടാല്‍ പാവം എന്നല്ലാതെ എന്ത് തോന്നാന്‍?

സമുദ്രങ്ങളുടെ മുഴക്കം പ്രാവിന്റെ കുറുകല്‍ ആക്കി
സൂസന്നാ,
നീ എന്നാണു ജലമായി മാറുന്നത്?

നിന്റെ ഒഴുക്കുകളില്‍ ചെറിയ പട്ടണങ്ങള്‍
ഒലിച്ചു പോകുന്നതെന്നാണ്?
നഗരങ്ങളുടെ അരികുകളെ നിന്‍റെ
തിരയുടെ അരം കൊണ്ട്
മൂര്‍ച്ച കൂട്ടി എടുക്കുന്നതെന്നാണ്?
ഭൂമിയുടെ അതിരുകളില്‍ വെച്ച് നീ ശരീരം
പറവകള്‍ക്ക് എറിഞ്ഞു കൊടുക്കുന്നത് എന്നാണ്?

നീ ഇല്ലാതാവുന്നതും എല്ലാമാവുന്നതും എന്നാണ്?

മിന്നലില്‍ സവാരി ചെയ്യുന്നവരേ,
നാട്ടു ചന്തയില്‍ ഉദ്ഘോഷിക്കരുതേ...
ഒന്നുറങ്ങാന്‍ വന്നതല്ലേ ഇവിടെ,
ഉറങ്ങിക്കോട്ടെ.

ഒരു മീന്‍ ആകുന്നത്...

2009-03-07T08:57:00.000-08:00

ഗര്‍ഭ ജലം വാര്‍ന്നു കഴിഞ്ഞ്
ഉള്ളില്‍ കുടുങ്ങിപ്പോയ കുഞ്ഞാകുന്നത്...

സഹിക്കാന്‍ കഴിയാത്ത ശ്വാസം മുട്ടല്‍
എല്ലാവരേയും പുറത്ത് എത്തിക്കുന്നു.

ജലത്തെ ഒഴുക്കായി അറിയുന്നത്...

ഒരിക്കലും വാര്‍ന്നു പോകാത്ത
ഒഴുക്കുകള്‍ എവിടെയാണ്?
ഒരിക്കലും വറ്റാത്ത മുലകള്‍,
ചൂട് മാറാത്ത മടിത്തട്ട്..
അമ്മയുടെ മടിയിലെ മീന്‍കുഞ്ഞായിരുന്നത് എത്ര പണ്ടാണ്?

എപ്പോഴും
തിരിച്ചു പോകാന്‍ തോന്നിപ്പിക്കുന്ന
ഒരിടമേ ഉള്ളൂ ഭൂമിയില്‍.
അവിടെ ചൂടെന്നോ തണുപ്പെന്നോ
ഓര്‍മയില്ല.
സുഖമായിരുന്നു.
അമ്മ വലിയ ഒരു സുഖവാസകേന്ദ്രം തന്നെ ആയിരുന്നു.
രണ്ടു ദിവസം നോവെടുപ്പിച്ചു ചോര വാര്‍പ്പിച്ചു
നിങ്ങളെ ചാകാറാക്കിയത്
അവിടെ തന്നെ ഇരിക്കാനുള്ള കൊതികൊണ്ടായിരുന്നു.
മീന്‍ ആകാനുള്ള കൊതി.
കരയണ്ട കരയണ്ട എന്ന് വെച്ചപ്പോഴാണ് ഡോക്ടര്‍ കൈയ്യില്‍ നുള്ളിയത്.
എന്റെ ചെകിളകള്‍ കൈകളായി മാറിയ നടുക്കത്തില്‍ ആണ്
ഞാന്‍ നിലവിളിച്ചത്.

ഒരിക്കലും പുഴേ,
ഞാനില്ല തര്ക്കുത്തരത്തിന് .
നീന്താന്‍ ഞാന്‍ പഠിക്കുകയേ ഇല്ല.
അമ്മ കടിഞ്ഞൂല്‍ കനത്തില്‍
മുലപ്പാല്‍ തന്നപ്പോഴേ
തീരുമാനിച്ചതാ ഞാന്‍,
മീന്‍ കുഞ്ഞാവണം.
നീന്താന്‍ പഠിക്കില്ല ഞാന്‍.
ചെകിള മുളച്ചു വാല് ഇളകി അങ്ങനെ വരും ഒരു ദിവസം.
നോക്കി നോക്കി ഇരുന്നോ...

ഒരു വേനലില്‍ നിന്ന് ഒരു ഇല അടര്‍ന്ന് നടക്കാനിറങ്ങുന്നു.

2009-03-03T09:23:00.000-08:00

ഒരു വഴിയില്‍ നമ്മള്‍
ഒന്നിച്ചു നടക്കുമ്പോള്‍
നിശബ്ദതയ്ക്കെന്തൊരു മുഴക്കം!
നമ്മള്‍ നമ്മളായി മാറുന്ന ഒച്ച.

എന്റെ നിഴലിനെ നിന്റെ
നിഴല്‍ കൊണ്ടളക്കുമ്പോ
നമ്മള്‍ പരസ്പരം രണ്ടു ഭൂപട രേഖകളാകുന്നു.
മുറിയുന്നു,
വഴിയൊരു ഭൂപടമാകുന്നു.
ചോര ചിന്താതെ മുറിയുന്ന രഹസ്യം അറിയുന്നു.

പുളിച്ചു തികട്ടല്‍

2009-02-15T12:31:00.000-08:00

ഓരോ പ്രണയ ദിനത്തിനും ഒടുക്കം
അതിന്റെ ജഡം
ഇങ്ങനെ ചത്തു പൊന്തി നടക്കുന്നത്
കാണാന്‍ എന്ത് ഭംഗി.
ഇല്ലാത്ത ചുവപ്പെടുത്ത്
ബലൂണില്‍ തേച്ചു വീര്‍പ്പിച്ചാല്‍
അതിനെ ഹൃദയം എന്ന് വിളിക്കാന്‍
ഇച്ചിരെ പുളിക്കും.
ആ വേല കയ്യിലിരിക്കട്ടെ.

മീന്‍കറി കോട്ടയം സ്റ്റൈല്‍

2009-02-14T00:09:00.000-08:00

നീ വായ തുറന്ന് വെച്ചു ഉറങ്ങിയപ്പോള്‍ ഇറങ്ങിപ്പോയ മീനുകള്‍ ചെകിളയിലെ നിറം എണ്ണി പണയം വെച്ചു ഇവിടെ കടം വാങ്ങി കൂട്ടുകയാണ്.
ശല്യങ്ങള്‍.
എനിക്ക് ഇവിടെ ജീവിക്കാന്‍ വയ്യാതായിരിക്കുന്നു.

വേണെങ്കി വന്ന് അതുങ്ങളെ എല്ലാം പിടിച്ചു കൊണ്ടു പോയ്ക്കോണം.
മുളകരച്ചു പിരട്ടി കുടംപുളി ഇട്ടു കറി വെച്ചു കളയും പറഞ്ഞേക്കാം.

നമ്മള്‍ ഉമ്മകള്‍ കൊണ്ടു മുറിച്ചു കടന്ന സമുദ്രങ്ങളില്‍ ഒറ്റയ്ക്ക് മുങ്ങി ചാവുകയാണ്.

ആകാശ മോക്ഷത്തിന്റെ വാതില്‍

2009-02-13T23:02:00.000-08:00

കൊച്ചുന്നാള് മുതല്‍ ഉള്ളൊരു
സംശയമാരുന്നു,
ആകാശ മോക്ഷത്തിന്റെ
വാതില്‍ ഇതെവിടാണെന്ന്?
കുരിശുവര മൊത്തം ഉറക്കം തൂങ്ങി
'അത്യന്ത വിരക്ത' വരെ കേള്‍ക്കും.
നീതിയുടെ ദര്‍പ്പണം കാണാതെ
ബോധജ്ഞാനതിന്റെ സിംഹാസനം കാണാതെ
ദാവീദിന്റെ കോട്ട കാണാതെ
വാഗ്ദാന പേടകം വരെ മയങ്ങും.
ഒടുക്കം ആകാശ മോക്ഷത്തില്‍
ഞെട്ടി പിടഞ്ഞു എണീറ്റ്‌ നോക്കുമ്പോ
ഒരു പിടിയും കിട്ടില്ല.
ആകാശ മോക്ഷത്തിന്റെ വാതിലേ...

ഒന്നാമത്തെ വീട്ടില്‍ വെച്ചു
വിചാരിച്ചു
നാലായി തുറക്കുന്നൊരു
നീല വാതിലാണതെന്ന്.
രണ്ടാമത്തെ വീടിന്റെ
ഒറ്റപ്പൊളി വാതില്‍
പിന്നെയും സംശയിപ്പിച്ചു.
ആനവാതില്‍ കാട്ടി അമ്പരപ്പിച്ച്
കത്തീഡ്റലും ചെറു പള്ളികളും.
രണ്ടായി വേര്‍പെട്ട് അകത്തേക്ക്
തുറക്കുന്ന ഹോസ്റ്റല്‍ വാതില്‍
കിര് കിരാന്നു കരഞ്ഞു പറഞ്ഞപ്പോള്‍
സത്യായിട്ടും ഓര്ത്തു പോയി
ഇതു തന്നെയാണതെന്ന്.

ഒടുക്കം
നീ കാവല്‍ നില്ക്കുന്ന
പ്രാചീന ഗന്ധങ്ങള്‍
പച്ച മങ്ങാത്ത തോലുരിഞ്ഞിട്ട്‌
നിന്റെ കണ്ണ് വെട്ടിച്ച്
ആകാശത്തേയ്ക്കൊളി സഞ്ചരിച്ചപ്പോ
ഞാന്‍ എന്റെ രണ്ടു കണ്ണാലെ കണ്ടു
ആകാശ മോക്ഷ വാതില്‍.
വെക്കം തുറന്ന്
എല്ലാ ഗന്ധവും
വലിച്ചെടുത്ത്‌
ഊക്കിലടയുന്ന വാതില്‍.

ഗണിതം

2009-02-13T22:56:00.001-08:00

ഒന്നില്‍ നിന്ന് ഒന്ന്
അടര്‍ത്തി മാറ്റുമ്പോള്‍
വില കിട്ടുന്നു.

ഉത്തരത്തിന് അടിയില്‍
നീ വന്ന്
രണ്ടു വര വരച്ചിട്.

വാലന്റൈന്‍

2009-02-13T22:45:00.000-08:00

ഇതിനിടെ കഴുകാനെത്ര പാത്രങ്ങള്‍, വൃത്തിയാകാന്‍ എന്റെ മുറി...

നീ അറിയുന്നുണ്ടാവുമോ,പഴയ കത്തുകള്‍ വരികള്‍ക്കിടയില്‍ മുറിവുകള്‍ വരയുമ്പോള്‍ അടുപ്പില്‍ തിളച്ചു തൂവി പോയതൊക്കെയും പ്രണയമായിരുന്നെന്ന്?

കളിക്കുടുക്ക

2009-02-12T10:05:00.000-08:00

.

കയ്യെത്തി പിടിക്കുമ്പോള്‍ വഴുതി പോകുന്ന മനസിനെ കുടുക്കാനുള്ള ചൂണ്ടലില്‍ കൊരുക്കാനൊരു മണ്ണിര ഇല്ലാത്തതാണ് ഇപ്പോള്‍ സംഭവിക്കുന്നത്.

ഇതല്ല ഇതല്ല...

മാങ്ങാത്തൊലി, ചൊരയ്ക്കാക്കുരു, ആനപ്പിണ്ടം,
ഛെ,
കുന്തം പോയി, കുടത്തില്‍ തപ്പ്.

വിശേഷാല്‍ പതിപ്പ്

2009-02-05T02:38:00.000-08:00

തേരോട്ടങ്ങളുടെ ഓര്മ്മ
ചരിത്ര നിശ്വാസങ്ങളുടെ ഓര്മ്മ

മറവിയുടെ ഭൂപടത്തില്‍
മുന്നോട്ടു മുന്നോട്ട്
നിസ്സഹായ പെരുവഴിച്ച്ചാട്ടയുടെ ഓര്മ്മ

പ്രാണ ഞരമ്പിനെ പിളര്‍ത്തി
ചിരിയും തമാശയും നുണഞ്ഞെടുക്കേണ്ട
ഗതികേടുകളുടെ ഓര്മ്മ

അധികാരത്തിന്റെ
ഒടുങ്ങാത്ത സൂക്ഷ്മ ദൃഷ്ടികളുടെ
ചോദ്യം ചെയ്യലുകളുടെ
നുണ പരിശോധനകളുടെ
നഗരം.

സന്കീര്‍ത്തനം മുതല്‍ വിധി ന്യായം വരെ...

2009-01-29T07:57:00.000-08:00

ആരീ വെള്ളച്ച്ചാട്ടങ്ങളെ
നിരന്തരം കെട്ടഴിച്ചു വിടുന്നു?

സമാധാനത്തിന്റെ കണക്കെടുപ്പ് അടുക്കും തോറും
എന്റെ ആധി ആരറിയാന്‍?
തകര്‍ന്ന പാലങ്ങളുടെ മുഖവടിവില്‍
എന്നേ ചേര്‍ക്കപ്പെട്ടു ഞാന്‍.

എല്ലാ വെള്ളച്ചാട്ടങ്ങളും നിന്റെ മീതെ കടന്നു പോകുന്നു
നിന്നെ നനയ്ക്കാതെ കടന്നു പോകുന്നു
എന്നെ തകര്‍ത്ത്‌ കടന്നു പോകുന്നു

ശിശിരം

2009-01-28T21:54:00.000-08:00

അത്ഭുത കാന്തമേ
തണുപ്പില്‍
കരിയാന്‍ മടിക്കുന്ന
മുറിവാണ് ഞാന്‍.
രക്തത്തില്‍ നിന്നെ
മുക്കിക്കൊന്ന്
നിന്റെ പേര് അനശ്വരമാക്കട്ടെ?

ഫ്ലൈ ഓവര്‍

2009-01-27T05:33:00.000-08:00

ആരെന്നും എന്തെന്നും
നിനക്കൊരു ചുക്കും അറിയാന്‍ മേലാത്ത
ആരാണ്ടൊക്കെ ഇരിക്കുന്ന വണ്ടികളെ
ഈ ദുരിതമേല്‍പ്പാലം കേറ്റി വിടാനല്ലാതെ
ഇത്ര ചിരിക്കാന്‍ മാത്രം നിനക്കെന്തറിയാം
കുടുക്ക് പാലമേ...

മഞ്ഞ

2009-01-23T05:03:00.000-08:00

ഒരു ഇല കൊഴിയുന്നതിന്റെ
നിശബ്ദതയാണത്.

കാറ്റില്‍ ഉലഞ്ഞു
ഉതിര്‍ന്നു പോകലുകള്‍.

നീയൊരു ഇലയായിരുന്നെന്ങില്‍
ഞാന്‍ അതിന്റെ ഞരമ്പില്‍
കുടുങ്ങിക്കിടന്നേനെ.

പലായനം

2009-01-21T05:41:00.000-08:00

ഒരു കുഞ്ഞു പൂവ് പ്രസവിച്ചതാണീ
മുഴുവന്‍ വസന്തത്തെ.

കൂരിരുട്ടിന്റെ തൊട്ടിലില്‍
വിരല്‍ നുണഞ്ഞുരങ്ങുമ്പോള്
പ്രപഞ്ചമേ, ഞാന്‍ നീയാണ്.

ഏറ്റവും ചെറിയ അപകടങ്ങള്‍

2009-01-15T12:03:00.000-08:00

ഒന്ന്:

ഇപ്പോഴും എല്ലാ ഞായറാഴ്ചയും
ആ പഴഞ്ചന്‍ നഗരത്തില്‍
വെളുപ്പിന്
പ്രാവിന്കാഷ്ടം മണക്കുന്ന
കുര്‍ബാനകള്‍ നടക്കുന്നുണ്ടാവും.

ഇത്ര കണിശമായി ജീവിക്കുന്ന മറ്റൊരു നഗരമില്ല.

രണ്ട് :

ഈ നഗരം എന്തൊരു ആഴം,
ഞാന്‍ ഇതില്‍ മുങ്ങി മരിക്കുകയാണ്.

മറൈന്‍ ഡ്രൈവില്‍ നിന്നും സൌത്തിലെയ്ക്ക് ഒരു ബൈക്ക് പായുമ്പോള്‍ ലോകം അറിയാതെ പോകുന്ന ചില ലോക കാര്യങ്ങള്‍.

2009-01-15T10:24:00.000-08:00

സൌത്ത് പാലം,
മുല്ല പൂക്കള്‍,
നിറം കോരിയിട്ട സാരി,
ചിരി, നടപ്പ്,
എല്ലാം നിനക്കു ബിംബങ്ങളാണ്‌.
വൈകുന്നേരം
എല്ലാം നിന്നെ വേദനിപ്പിക്കുന്നു,
നിന്നിലെ പച്ചച്ച നീലച്ച മഞ്ഞച്ച മനുഷ്യന്‍
ചങ്ക് പൊട്ടി
വിങ്ങി വീര്‍ത്തു വശക്കേടായി...
ഒന്നും പറയണ്ട...ഹൊ!

ഒടുവില്‍
നശിച്ച പാതിരകളില്‍
അടുത്ത്
വാ പൊളിച്ചു കിടക്കുന്നവനെ
കുലുക്കി ഉണര്‍ത്തി
'എടാ, നമുക്കു പെണ്ണ് പിടിക്കാന്‍ പോകാം'
എന്ന് പറയിപ്പിക്കുന്നത് എന്താണ് ?
മനുഷ്യ സ്നേഹികളെ ഒരെണ്ണത്തിനെയേലും
വിശ്വസിക്കാവോ? പറ!

ഡെഡ് ലൈന്‍

2008-12-04T01:11:00.000-08:00

തലയണയില്‍ കുമിയുന്ന
നിശ്വാസ കയങ്ങള്‍.
ഏകാന്ത മൌനങ്ങള്‍.
ദുസ്വപ്ന ജാഗ്രത.
മുങ്ങിത്താഴാതിപ്പോഴും
ചൂണ്ടു വിരലുകള്‍.
തണുപ്പ്.
ഓര്‍മകളുടെ നൂറ്റാണ്ടുകള്‍.

ഈ കിടക്കയുടെ ഏത് മൂലയില്‍
ഉറക്കത്തിന്റെ ക്ഷേത്ര ഗണിതം
വഴി തെറ്റി കിടക്കുന്നു?
ഞാന്‍ അര്‍ഹിക്കുന്നില്ല ഈ പീഡ.
രാത്രികളുടെ കാവല്‍ മാലാഖേ,
എന്നെ നിന്റെ കയ്യില്‍ എടുക്കുക.

കടല്‍ കാണാ കര

2008-12-02T09:50:00.000-08:00

ജലം കൊണ്ടൊരു കപ്പല്‍
തീരത്തടുക്കുമ്പോഴാവും
ഞാന്‍ മുങ്ങി മരിച്ചവന്റെ
നെറുകയിലെ മുറിവാകുക.

വെളുത്തു വിളറുന്ന
മുറിവെന്ത് മുറിവ്?
ഒരു രസവുമില്ല.

ശിശിരം റബരിലക്കടലില്‍
കപ്പലോട്ടിയ ബാല്യവീറ്
അപ്പോള്‍ ഓര്‍മ്മിക്കാവുന്നത്.

പച്ചക്കയ്യാലയും
വാള്പ്പയറ്റു പായലും
മുട്ട് പൊട്ടുന്ന വീഴ്ചയും
ചൊമചൊമപ്പന്‍ ചോരയും
അപ്പോള്‍ ഓര്‍മ്മിക്കാവുന്നത്.

ഇറക്കിയിട്ട്‌ കാല്മുട്ടൊളിപ്പിച്ച
മഞ്ഞ പാവാടയും തൊങ്ങലും
ആകാശത്തോളം നൂല്‍ വലിയുന്ന
നീല അടിയുടുപ്പും
കമ്മ്യൂണിസ്റ്റ് പച്ചയുടെ നീറ്റലും കൂടി...

നങ്കൂരത്തിന്റെ കനം കൊണ്ടോ
ചിതലിന്റെ അരം കൊണ്ടോ
കപ്പല്‍ മുങ്ങിയതെന്ന് ഓര്‍മ്മയില്ല.

കാണാതാക്കിയ നാണയത്തിന്റെ ഉപമ.

2008-11-29T10:06:00.001-08:00

ആയിരം പൊന്‍പണം കയ്യില്‍ ഉണ്ടെന്ന്നിരിക്കെ അതില്‍ ഒന്നു കള്ളനാണയം ആണെന്ന് തിരിച്ചറിയുമ്പോള്‍ ഏതൊരു നല്ല സത്യ ക്രിസ്ത്യാനിയെയും പോലെ കൈവശമുള്ള എല്ലാ പൊന്‍ നാണയങ്ങളെയും സഹകരണ ബാങ്കില്‍ നിക്ഷേപിച്ച്‌ ആ ഒരു കള്ള നാണയത്തെ വെള്ള പൂശാന്‍ നിങ്ങള്‍ നടക്കുന്നു. ഏകദേശം മുക്കാല്‍ മണിക്കൂറിനുള്ളില്‍ തന്നെ നിങ്ങള്‍ തിരിച്ചറിയുന്നു ആ നാണയം നേരെ ചൊവ്വേ ഒഴിവാക്കാന്‍ നിങ്ങള്ക്ക് കഴിയില്ലെന്ന്.

വസ്തു കച്ചവടം പോലെ ചില അതിപുരാതന സംബന്ധങ്ങളില്‍ ഈ വെള്ളിക്കാശിനെ ഒളിപ്പിക്കാന്‍ സമ്മതിക്കാത്ത വല്ലാത്ത ഒരു സന്മനസാണ് നിങ്ങളുടെത്. ഈ വെള്ളിക്കാശ്, കെട്ടിച്ചു വിടാറായ നീലച്ചിത്ര നായികയെ പോലെ നിങ്ങളുടെ പോകറ്റില്‍ കിടക്കുന്നതോര്‍ത്തു നെഞ്ച് വേവുമ്പോഴും സത്യത്തിനു നിരക്കാത്തത് ചെയ്യാന്‍ കര്‍ത്താവിന്റെ തിരുമുറിവുകളെ പ്രതി നിങ്ങള്ക്ക് കഴിയുന്നില്ല.

ഒടുവില്‍ എന്ത് ചെയ്യാന്‍, നീ തന്നെ തന്നു. നീ തന്നെ എടുക്ക്ക്. ഞായറാഴ്ച പിരിവിന്റെ കനം പാത്രത്തില്‍ ചിലംമ്പിയപ്പോള് മിഴിഞ്ഞു പോയ കൈക്കാരന്റെ കണ്ണുകള്‍ കര്‍ത്താവേ നിന്നെ ഒറ്റ്കൊടുക്കാതിരിക്കട്ടെ.

അന്താരാഷ്ട്രം

2008-11-23T23:11:00.000-08:00

ഭൂമിശാസ്ത്രവും ഭൌതിക ശാസ്ത്രവും
അന്ജിലെത്തിയപ്പോള്‍ അല്ലേ ഞാന്‍ പഠിക്കാന്‍ തുടങ്ങിയത്‌.
ഒന്നില്‍ പഠിക്കുമ്പോ
തുള വീണ എന്റെ അടിയുടുപ്പ് പൊക്കിപ്പിടിച്ച്
'പാകിസ്താന്‍ ബോംബിട്ടതാണോ ?'
എന്നൊക്കെ ചോദിച്ചാല്‍
ചിറ്റമ്മമാരേ എനിക്കറിയാവോ,
രാജ്യങ്ങള്‍ തമ്മിലുള്ള സന്ഘര്‍ഷം ഒക്കെ...

കാല്‍പ്പനികം രണ്ടാം അദ്ധ്യായം

2008-11-04T20:25:00.000-08:00

ആയുസ്സിന്റെ കനം കൂടിയ ഒരു പാളിയില്‍ നീയിരിക്കുന്നു.

നിന്നെ മറിച്ചു മറിച്ച് വായിക്കും തോറും ഞാന്‍ തേഞ്ഞു തേഞ്ഞ്
തീരുന്നു.

നീയും നമ്മുടെ മൌനവും കനത്തു കനത്ത് ഏത് തുലാ തോര്ച്ചയെ തോല്‍പ്പിക്കാന്‍ ഒരുങ്ങുകയാണ്?

നിറഞ്ഞു പെയ്യുന്നു പൊന്നേ, കാലവര്‍ഷത്തിന്റെ തീരാപ്പക.

വരിക,മഞ്ഞിനു മീതെ ഏത് പേമാരിയെക്കാളും പൊള്ളിക്കുന്ന ഓര്‍മകളുടെ വല കെട്ടിയിട്ടുണ്ട്.

ചുടല

2008-09-27T00:11:00.000-07:00

മണ്ണില്‍ മഴച്ചാലുകളില്ല,

വറ്റാത്ത നനവുകളില്ല,

പ്രണയം പോലാര്‍ദ്രമാം

ഞെട്ടലുകളും...

ചാരവും മാംസവും

കലരുന്ന മണ്ണില്‍

എല്ല് പൊട്ടുന്ന നടുക്കങ്ങള്‍ മാത്രം.

മോഷണക്കൂട്ടം

2008-09-01T18:35:00.000-07:00

ഉള്ളതെല്ലാം വിളിച്ചു പറഞ്ഞേ,

ഞങ്ങള്‍ എല്ലാരും.

നിങ്ങളുടെ രാജാവ് നഗ്നനാണെന്നും

ചത്താലും ഞങ്ങള്ക്ക് നീതി വേണമെന്നും...

ഞങ്ങള്‍ മോഷ്ടിച്ചത്

നിങ്ങള്‍ ഇത്രേം നാള്‍

കൂട്ടി തുന്നിയ

നുണയെല്ലമല്ലേ..

നോക്ക്, പെരപ്പുറത്ത്‌ അലക്കി വിരിച്ചിട്ടുന്ടെല്ലാം...

കീറിയതും പിഞ്ഞിയതും തുള വീണതും...

മുങ്ങാങ്ങോഴി

2008-07-30T00:42:00.000-07:00

ആയിരം അരഞ്ഞാണമിട്ട
അരക്കെട്ടാണ് കിണര്‍.
ഇറങ്ങി ചെന്നു ആഴമളക്കാന്‍
ആര്ക്കാണേറെ കൊതി തോന്നാത്തത്??

വട്ടത്തിലെളേമ്മ

2008-07-11T05:19:00.000-07:00

വിണ്ടു വരണ്ട്
ഒരു തുകല് ചിരി .
കുണ്ക്കിന് കൊമ്പത്ത്
രണ്ടൂഞാലുകള് .
ഇടിഞ്ഞു ഞാന്നു
രണ്ടു പഞ്ഞിക്കെട്ടുകള് .
ക്ടാവിന്റെ കയറും
കയിലിന്റെ കണയും
വാഴെലേം ചാരവും
അരമിട്ട കൈപ്പാടം .
ഇടിഞ്ഞമ്മന്തീടെ പുളി.
ചക്ക വരട്ടി വിയര്ത്ത ഉപ്പ് .
നീലം പടര്ന്ന കരിമ്പന് ചട്ട .
മല്മല് മുണ്ട് അടുക്കിട്ടത്.
എളേപ്പന് മാറ്റി വെച്ച
മുഴുത്ത മീന് കഷണം .
ശബ്ദമില്ലാത്തൊരു വായ .
പൊക്കമില്ലാതൊരു വട്ടം .
പെറ്റു പെരുത്തൊരു വയറ്.
കണ്ചാറ്റ്ല് പൊള്ളിച്ച മുഖം .
ഓര്മയിലെന്നും നീയൊ_
രടുപ്പ് പാതകത്തിന്റെ ചൂട്.

മള്‍ട്ടി നാഷണല്‍ ആദം

2008-06-09T22:31:00.000-07:00

പെണ്ണേ, പണ്ടൂരിയ
വാരിയെല്ല് തിരിച്ചു തരണേ....

പഴയൊരു നട്ടെല്ലൊണ്ട് തരാം.
pc അളവില്‍
വളഞ്ഞു വളഞ്ഞ്...

പോ പാമ്പേ,
നിന്റെയൊരു അറിവുമരോം പഴോം..

നിനക്കു മണ്ണ് തിന്നെഴഞ്ഞാ മതി,
ഞാനോ, മണ്ണ് തൊടാതെ
കുഴഞ്ഞു മറിഞ്ഞ്‌...

ആരെങ്ങിലുമീ
എ സി ഒന്നണയ്ക്കണേ...

നെറ്റിയിലെ വിയര്‍പ്പു
കൊണ്ടപ്പം ഭക്ഷിപ്പാന്‍
കല്പ്പനയുണ്ടേ...

ഞാനൊന്ന് വിയര്‍ത്തോട്ടെ...

മഴച്ചെറുക്കന്

2008-06-04T00:07:00.000-07:00

ആദ്യത്തെ മഴയുടെ
വാശിക്കിലുക്കം
വന്നലയ്ക്കുന്നു വെളുപ്പിന് കാതില്‍.
ആകാശമോരോരോ
നൂല്പ്പാലമിട്ടു
കളിക്കുന്നുണ്ട് അങ്ങോട്ടുമിങ്ങോട്ടും.
ഓടിയോടി വന്ന്
കിടന്നുരുണ്ടു മറിയുകയാണ്
മഴ.
ചെറുക്കനിപ്പം
ദേണ്ടൊരു ചെളിച്ചെറുക്കന് .
ചിരിച്ചോണ്ട് നില്ക്കുന്നു,
മഴയെല്ലാമറിഞ്ഞിട്ടു-
മൊന്നിലും നനയാതെ ഞാന്‍.

കാലുകള്‍

2008-05-06T03:38:00.000-07:00

ഒരാളെ കാണുമ്പോള്‍ ആദ്യം

കാലുകളില്‍ നോക്കുമെന്നു നീ പറഞ്ഞു.

തേഞ്ഞു തുടങ്ങിയ വള്ളി ചെരിപ്പാണെങ്കില്
നിനക്കു കൊച്ചി ഭാഷയിലൊരു " യ്യേ"

വള്ളിചെരിപ്പില്‍ കാലുകള്‍ സുവ്യക്തം.

പോളിഷ് ചെയ്തു മിനുക്കിയ

കറുത്ത ഷൂസിനുള്ളില്, വെളുത്ത സോക്സിനു കീഴെ

അവന്‍ ഒളിപ്പിച്ചു വെയ്ക്കുന്നത്

കുഴിനഖം ആവാം , പുഴുക്കടി ആവാം,

വെടിച്ചു കീറിയ ഉപ്പൂറ്റിയുമാവാം.

ബൂട്ടിനുള്ളില്‍ തോക്കാവാം , കഠാരയാവാം.

നിനക്കു "യ്യോ" തോന്നുന്ന മറ്റെന്തുമാവാം
മനുഷ്യന്‍ അവന്റെ ഹൃദയത്തെ

കാലുകളിലല്ല സൂക്ഷിക്കുന്നത് .

ചെരിപ്പ്

2008-04-24T22:26:00.000-07:00

ഞാന്‍ നിന്റെ പുതിയ ചെരിപ്പാണ്.

ഞാന്‍ തന്ന നീറ്റല്‍,

വഴങ്ങാത്ത തുകലിന്റെ ച്ചുട്ടുനീററല്

നിനക്കു അസഹനീയമെങ്ങില്

നിറുത്തിയേക്കാം ഈ നശിച്ച സഹയാത്ര .

ക്ഷമിക്ക് ,

തുകലിനെ പിളര്‍ത്തി ഒരു

കത്തി പാളിയ വേദനയില്‍

ഞാനോര്‍ത്തില്ല

എന്റെ വഴങ്ങാത്ത അരികുകള്‍

നിന്റെ മിനുത്ത കാല്പാദത്തില്‍

ഉരഞ്ഞു പൊട്ടി തഴമ്പു വീഴുമെന്ന് .

നീ അമര്ത്തിച്ചവിട്ടി നടന്നു പോ.

എന്നെ എടുത്തണിഞ്ഞു

ചേറില്‍ ചവിട്ട്‌ ,ചെളിയില്‍ ചവിട്ട്‌ !

വാറു പൊട്ടുമ്പോള്‍ ദൂരെയെറിയ്,

തഴമ്പു കാണുമ്പോഴൊക്കെ ശപിക്ക് .

ഞാന്‍ നിന്റെ കാല്‍ക്കീഴില്‍

അമര്‍ന്നു കിടന്നോട്ടെ .

നിനക്കു മുള്ളുകൊള്ളാതെ നോക്കി

നിന്റെ ഭാരം താങ്ങി

നിന്റെ ചവിട്ടടിയില്‍ ഒതുങ്ങിക്കിടക്കട്ടെ .

തുകല്‍ തേയും വരെ , വാറു പൊട്ടും വരെ .

അല്ലെങ്ങില്‍ നീ വേറെ ചെരിപ്പ് വാന്ങ്.

ചെരിപ്പിന് കാല് മാറ്റാനാവില്ലല്ലോ .

ഔട്ട് - ഓഫ് - ഫാഷന്‍

2008-04-23T04:03:00.000-07:00

എന്റെ തലയുടെ

തുന്നലഴിഞ്ഞു പോകുന്നു .

ഹൃദയത്തിലൊരു നൂല്‍

ഇഴപൊട്ടി അകലുന്നു .

തുരുമ്പിച്ച കട - കട -

ഇരുട്ടിന്റെയോരത്ത്

കണ്ണുമിഴിച്ചി -

ട്ടുറങ്ങാതിരിക്കുന്നു .

വിഴുങ്ങപ്പെടാതൊരു

ഗദ്ഗദം മാത്രം

തയ്യല്തുംപൊളിക്കാതെ

തപിച്ചു കിടക്കുന്നു .

(അ ) ഭാവ ഗീതം

2008-04-19T02:34:00.000-07:00

വഴി വിളക്കെ ,

നിന്നോടെനിക്കു പ്രണയമില്ല .

ഞാന്‍ വെളിച്ചം തേടി നടന്നു

ചില്ലില്‍ തലയിടിച്ചു ചാകുന്ന

ഈയാം പാറ്റയല്ല .

നീ മുനിഞ്ഞു കത്തിയിട്ട്

എണ്ണ തീരുമ്പോള്‍ കരിന്തിരിയാകണം .

ഞാന്‍ സൂരൃനിലേയ്ക്ക് പറക്കട്ടെ .

നീ വഴിയില്‍ എരിയുന്ന

മോഹന ദീപമാകുമ്പോള്‍

ഞാന്‍ മുറിയടച്ചു വാതില്‍ തഴുതിട്ട്

ഒറ്റയ്ക്ക് തപസ്സിരിക്കട്ടെ .

അല്ലെങ്കില്‍,

നീ യോഗ്യത തെളിയിക്ക് .

ഒരിക്കലുമണയാതെ തെളിഞ്ഞു കാട്ടു .

ശ്വാസമെടുക്കാതെ ജീവിച്ചു കാട്ടു .

വഴിവിളക്കെ , നിന്നോട് സഹതപിക്കട്ടെ ഞാന്‍ .

എന്റെ ചിറകുകള്‍ , നിന്റെ ചുവട്ടിലെരിഞ്ഞ

ആയിരം പാററച്ചിറകുകളുമായി ചേരില്ല .

വഴി വിളക്കെ , പാവം വഴി വിളക്കെ ,

നിന്റെ ഇത്തിരി വെട്ടത്തിന്റെ

കള്ളക്കുടുക്ക് ഞാന്‍ പൊട്ടിച്ചെറിയും .

നിന്നോട് ഹൃദയം നിറയെ സഹതാപമാണ് .

മടി

2008-04-18T21:20:00.000-07:00

പുതുക്കി പണിയേണ്ടി വരൂ-

മെന്നോര്ത്തൊരു വീട്

പണി തീരാന്‍ മടിക്കുന്നു .

മുഖച്ഛായ മാറ്റേണ്ടി വരൂ-

മെന്നോര്ത്തൊരു മുഖം

ചിരിക്കാന്‍ മടിക്കുന്ന പോലെ.

തിരസ്കരിക്കപ്പെടുമെന്ന

പേടി കൊണ്ടൊരു കുഞ്ഞ്

പിറക്കാന്‍ മടിക്കുന്ന പോലെയും .

വ്യാകുലം

2008-04-18T03:46:00.000-07:00

കരഞ്ഞു തീര്‍ക്കാന്‍ വിടാതെ

എല്ലാ മൂന്നാം നാളിലും

എന്റെ പ്രാണസങ്കടത്തിനു മേല്‍

നീ ഉയിര്‍ത്തെണീക്കുന്നതെന്തിന് ???

പിരിച്ചെഴുത്ത്

2008-04-18T03:40:00.000-07:00

തലയോട് എന്ത് തരം ഓടാണ് ?

പുര മേയാന്‍ കൊള്ളുമോ ??

എങ്കില്‍ എനിക്കും കുറെയേറെ വേണം .

വെളിച്ചം കടക്കുന്ന ചില്ല് കഷണങ്ങള്‍

ഇടയ്ക്കിടെ ചേര്ത്തു

ഭംഗിയായി മേയണം .

കഴുക്കോല്‍ നല്ല ബലമുള്ളതായിരിക്കണം .

തൊട്ടില്‍ കെട്ടാനും കഴിയണം ,

തൂങ്ങി മരിക്കാനും കഴിയണം .

ഓടിട്ട വീടിന് ഒരുപാട് സാധ്യതകളാണ് .

മാലാഖായോഗം

2008-04-18T02:47:00.000-07:00

മുഖ ലക്ഷണം വിശൂദ്ധമായിരുന്നില്ല.
എന്നിട്ടും എപ്പോഴും സ്കൂള്‍ നാടകത്തില്‍
ഞാന്‍ മാലാഖയായിരുന്നു .

അന്നൊക്കെ ശബ്ദം വിറച്ചിരുന്നു .

സംഭാഷണങ്ങള്‍ ഛര്‍ദ്ദിക്കാനാവാതെ
എന്റെ ശബ്ദം വിറച്ചിരുന്നു.

മാലാഖയ്ക്ക് ഡയലോഗില്ലായിരുന്നു !

വെള്ളചിറകുണ്ടായിരുന്നു ,
മന്ത്രവടിയുണ്ടായിരുന്നു ,
മഞ്ഞുതുള്ളി ഞൊറിയിട്ടപോല്‍
സുന്ദരന്‍ വെള്ളയുടുപ്പുണ്ടായിരുന്നു .

സംഭാഷണം മാത്രം ഇല്ലായിരുന്നു .

അങ്ങനെ എന്നുമെപ്പോഴും
മാലാഖ !

ഇപ്പോള്‍ മന്ത്രവടി ചിതലെടുത്തു കാണും .
വെള്ളയുടുപ്പും തൂവല്‍ ചിറകും
പിന്നാംപുറത്തു ചാറ്റല്‍ മഴ നനഞ്ഞു
കരിമ്പന്‍ അടിച്ച് കിടപ്പുണ്ടാവും ...

പക്ഷിയും മരവും

2008-04-14T22:45:00.000-07:00

നീ ചിറകൊടിഞ്ഞ പക്ഷിയാണ് .

ആകാശം നഷ്ടപ്പെട്ട ഗഗനചാരി.

നിനക്കു വിശ്രമിക്കാന്‍ ശിഖരങ്ങള്‍ ഇല്ലല്ലോ ??

എന്റെ ചെറു നാമ്പുകള്‍ ഒക്കെ ആരാണ്

വളരും മുന്പേ അറുത്തു കളഞ്ഞത്‌ ?

വെട്ടി ഒടിച്ചു തീയിടുന്നതാണ് ചിലര്‍ക്കിഷ്ടം.

പക്ഷെ വേഗത്തില്‍ ഞാന് വെണ്ണീറായാല്

ആനന്ദ മൂര്ച്ഛ ലഭിക്കാത്തവര്‍ ഉണ്ട് .

അവര്‍ ധര്‍തിയില്‍ വേര് തുരക്കും,

മുറിവില്‍ നിറയെ രസം തേയ്ക്കും,

വീണ്ടും മണ്ണ് പുതപ്പിച്ചു കടന്നു കളയും.

ഞാന്‍ ഉണങ്ങിക്കൊണ്ടിരിക്കുകയാണ് .

എന്റെ വീഴ്ച അതിവേഗം ആയിരിക്കും .

എങ്ങിലും നിന്നെ റാഞ്ചി എടുക്കാന്‍

പ്റാപ്പിടിയന്മാര് തിരക്കി വരുമ്പോള്‍

നീ എന്റെ അരികില്‍ ചേര്ന്നു നിലക്ക് .

ഇലപ്പടര്‍പ്പുകള്‍ ഇല്ലെങ്ങിലും എന്നില്‍

നിഴലിന്റെ ഒരു നേര്‍ രേഖ ബാക്കിയുണ്ട് .

അവിടെ നിനക്കു ഒളിച്ചിരിക്കാം .

എനിക്ക് നിന്നെയോ നിനക്കു എന്നെയോ

രക്ഷിക്കാന്‍ ആയെന്നു വരില്ല .

എപ്പോള്‍ വേണമെങ്ങിലും നീ പിടിക്കപ്പെടാം .

എപ്പോള്‍ വേണമെങ്ങിലും ഞാന്‍ പൊടിഞ്ഞു വീഴാം .

ഇനി അവശേഷിക്കുന്ന നിമിഷങ്ങള്‍ എങ്ങിലും

നമുക്കു ഒരുമിചിരിക്കാം ,

പരസ്പരം തോള്‍ ചേറ്ത്തു

ഏങ്ങലുകെള കൂട്ടിക്കെട്ടി ,

തരംഗ വീചികള്‍ ഉയര്ത്തി വിടാം .

വഴിയോരം

2008-04-11T00:09:00.000-07:00

ഇവിടെയെല്ലാം

രക്തത്തിന്റെ

ഉളുംപ് നാറുന്നുണ്ട്.

ആരെല്ലാമോ

ആരെയൊക്കെയോ

തോല്‍പ്പിക്കാന്‍ ശ്രമിക്കുന്നുണ്ട്.

നെല്ലിപ്പലക

2008-04-09T23:38:00.000-07:00

ഒരു നെല്ലി മരം നടണം.

വളമിട്ടു വളര്‍ത്തി ,

കാതല്‍ ഉറയ്ക്കുമ്പോള്‍

വെട്ടിയടുക്കി പലകയാക്കണം .

മുറ്റത്തെ ചെപ്പു വറ്റിച്ചു

അടിയിലീ പലക ഇടണം .

നെല്ലിക്ക തിന്നിട്ടു കുടിച്ച പോലെ

എന്നും മധുര നീര് കുടിക്കാം .

നേരം പോക്കിനു ഇടക്കിടെ

കിണറ്റിനടി വരെ ഇറങ്ങി ചെന്നു

നെല്ലിപ്പലക കാണുകയും ചെയ്യാം .

ക്ഷമയുടെ നെല്ലിപ്പലക .

പരകായ പ്രവേശം

2008-04-09T00:00:00.000-07:00

ഇരട്ട പിറക്കാന്‍ അല്ലെങ്ങില്‍

ചാപിള്ളയായി പോകണം.

ഒറ്റയ്ക്ക് ജനിക്കുന്നതും ,

പൊക്കിള്‍ക്കൊടി മുറിക്കുന്നതും ,

ഉറക്കെ കരയുന്നതും

ഒറ്റക്ക്‌ മരിക്കുന്നതും

ഒക്കെ കളവാ ണ് .

ഒരു ശരീരവും ,

പല വ്യക്തികളുമായി ജീവിക്കാം.

നുണ ക്ക് മീതെ നുണ പറയാതെ,

വിശ്വാസത്തിന്റെ കിട്ടാക്കടം ചോദിയ്ക്കാതെ ,

ചിലപ്പോള്‍ ദേവ സ്ത്രീ ആയും ,

ചിലപ്പോള്‍ അസുര സ്ത്രീ ആയും ,

ഇടയ്ക്ക് ചിലപ്പോള്‍ മനുഷ്യ സ്ത്രീ ആയും ,

ഒരു ശരീരത്തില്‍ തന്നെ

ഒരു പരകായ പ്രവേശം .

കാല്‍(പനി)കം

2008-04-08T22:46:00.000-07:00

മഴ ചാട്ട വീശിയ വഴിവക്കില്‍

വെറുങ്ങലിച്ചു വിറച്ചു...

ചാറ്റല്‍ മഴയുടെ നനുത്ത സ്വപ്നം

ഓടയില്‍ ഒലിച്ചു പോ ണതു നോക്കി ,

ഉടുപ്പുകള്‍ എല്ലാം കൂട്ടി പിടിച്ചു ,

കുടയുടെ വിപ്ലവ കാറ്റില് ഉലഞ്ഞു,

കോച്ചുന്ന കാല്‍ രണ്ടും നീട്ടി വെച്ചു ,

ഒരു കട്ടന്‍ മാത്രം കൊതിച്ചു ,

ആണ്ടെ പ്രണയം നടന്നു പോകുന്നു.

പിന്നില്‍ തെറിച്ച ചെളിചിത്രം കൊള്ളാം ,

എത്ര അലക്കിലും മായാതോരോര്‍മ്മ.

ആരവം

2008-03-14T22:33:00.000-07:00

ഞാന്‍ ഇല്ലാതാവുകയാണ് ...

ഓറഞ്ച് വലിപ്പത്തില്‍

വെളുത്ത കല്ലുകള്‍ ഉരുളുന്ന ശബ്ദം.

തനിച്ചു ജനിച്ചു.

തനിച്ചു മരിക്കും.

മഞ്ഞുകാലത്തില്‍ നിന്നും

മഞ്ഞുകാലതിലെയ്ക്കുള്ള ദൂരം

ഭൂമിയുടെ ഒരറ്റം മുതല്‍

അങ്ങേ അറ്റം വരെയാണ്.

തനിച്ചു തന്നെ ആവും മരണം.

ഉറപ്പാനിപ്പോള്‍.