Monday, June 9, 2008

മള്‍ട്ടി നാഷണല്‍ ആദം

പെണ്ണേ, പണ്ടൂരിയ
വാരിയെല്ല് തിരിച്ചു തരണേ....

പഴയൊരു നട്ടെല്ലൊണ്ട് തരാം.
pc അളവില്‍
വളഞ്ഞു വളഞ്ഞ്...

പോ പാമ്പേ,
നിന്റെയൊരു അറിവുമരോം പഴോം..

നിനക്കു മണ്ണ് തിന്നെഴഞ്ഞാ മതി,
ഞാനോ, മണ്ണ് തൊടാതെ
കുഴഞ്ഞു മറിഞ്ഞ്‌...

ആരെങ്ങിലുമീ
എ സി ഒന്നണയ്ക്കണേ...

നെറ്റിയിലെ വിയര്‍പ്പു
കൊണ്ടപ്പം ഭക്ഷിപ്പാന്‍
കല്പ്പനയുണ്ടേ...

ഞാനൊന്ന് വിയര്‍ത്തോട്ടെ...

Wednesday, June 4, 2008

മഴച്ചെറുക്കന്

ആദ്യത്തെ മഴയുടെ
വാശിക്കിലുക്കം
വന്നലയ്ക്കുന്നു വെളുപ്പിന് കാതില്‍.
ആകാശമോരോരോ
നൂല്പ്പാലമിട്ടു
കളിക്കുന്നുണ്ട് അങ്ങോട്ടുമിങ്ങോട്ടും.
ഓടിയോടി വന്ന്
കിടന്നുരുണ്ടു മറിയുകയാണ്
മഴ.
ചെറുക്കനിപ്പം
ദേണ്ടൊരു ചെളിച്ചെറുക്കന് .
ചിരിച്ചോണ്ട് നില്ക്കുന്നു,
മഴയെല്ലാമറിഞ്ഞിട്ടു-
മൊന്നിലും നനയാതെ ഞാന്‍.